Oluwunmi Olapeju Mosaku (), profesjonelt kjend som Wunmi Mosaku, er ein nigeriansk-britisk skodespelar. Ho vart kjend for rollene sine som Joy i BBC Two-miniserien Moses Jones (2009) og Holly Lawson i ITV-serien Vera (2011–2012). Ho vann BAFTA TV Award for beste kvinnelege birolle for rolla som Gloria Taylor i TV-filmen Damilola, Our Loved Boy (2016). I 2019 medverka ho i den femte sesongen av Luther, før ho spelte Ruby Baptiste i HBO-serien Lovecraft Country (2020). Ho portretterte figuren Hunter B-15 i Disney+-serien Loki (2021–2023) i Marvel Cinematic Universe, og tok opp att rolla i filmen Deadpool & Wolverine (2024).
Mosaku vart nominert til BAFTA for beste kvinnelege hovudrolle og vann BIFA-prisen for beste skodespelarprestasjon i ein britisk uavhengig film for rolla som Rial i filmen His House (2020). For rolla som Annie i skrekkfilmen Sinners (2025) vann ho Gotham Independent Film Award for framifrå birolleprestasjon og BAFTA-prisen for beste kvinnelege birolle, og vart nominert til Oscar, Critics’ Choice Movie Award og Actor Award.
Bakgrunn Mosaku vart fødd i Zaria i Nigeria av joruba-foreldre, som begge var professorar. Då ho var eitt år gammal, flytta familien til Manchester i England, der ho vaks opp og gjekk på Trinity Church of England High School og Xaverian Sixth Form College. Ho song i Manchester Girls Choir i elleve år. Mora starta eiga verksemd, medan faren etter kvart flytta tilbake til Nigeria. Mosaku studerte skodespelarkunst ved Royal Academy of Dramatic Art (RADA), der ho tok bachelorgrad i skodespel i 2007.
Karriere Mosaku debuterte profesjonelt på teaterscena i 2007 ved Arcola Theatre i ei oppsetjing av Pedro Calderón de la Barca-stykket The Great Theatre of the World. I 2008 spelte ho i Rough Crossings, regissert av Rupert Goold og basert på boka til Simon Schama, ved Lyric Hammersmith. Ho medverka seinare i The Vertical Hour (2010) av David Hare og Truth and Reconciliation (2011), begge ved Royal Court Theatre.
I 2008 deltok ho i den første UNDEREXPOSED-utstillinga ved National Portrait Gallery, som hadde som mål å løfte fram svarte førebilete og synleggjere talent i det svarte britiske miljøet. Biletet hennar vart også vist på Commercial Way i Peckham i London som del av utstillinga. I 2009 spela ho i BBC Two-serien Moses Jones, og for denne rolla vann ho prisen for beste skodespelar i ein miniserie under Rome Fiction Festival.
Mosaku prydde framsida av Screen International i juni–juli 2009 som ein av «UK Stars of Tomorrow», og i 2011 vart ho omtalt i Nylon Magazine sitt «Young Hollywood»-nummer. I 2010 vart ho kåra til ein av «The Seven Fresh Faces» under Toronto International Film Festival for filmen I Am Slave, der ho hadde hovudrolla. Ho spelte Malia, ei jente som vert bortført frå landsbyen sin i Sudan og seld til slaveri. Rolla gav henne fleire prisar, mellom anna beste skodespelar ved Birmingham Black Film Festival, beste skjermprestasjon ved Cultural Diversity Awards og beste kvinnelege prestasjon ved Screen Nation Awards.
I 2011 spelte Mosaku i Vera i rolla som Holly Lawson. I 2015 hadde ho rolla som Quentina, ein trafikkbetjent, i den tredelte BBC-serien Capital, basert på romanen med same namn av John Lanchester. I 2016 medverka ho i episoden Playtest i antologiserien Black Mirror. Same året vann ho BAFTA Television Award for beste kvinnelege birolle for rolla som Gloria Taylor i TV-filmen Damilola, Our Loved Boy.
I 2025 spelte Mosaku rolla som hoodoo-healeren Annie i vampyrfilmen Sinners av Ryan Coogler. The New York Times omtalte prestasjonen hennar som «den sjelfulle kjernen» i filmen. Ho vart seinare nominert til Oscar for beste kvinnelege birolle ved den 98. Oscar-utdelinga. Sinners fekk til saman 16 nominasjonar, noko som var rekord for filmen det året.
Privatliv Då Mosaku vart spurd om personlege førebilete, nemnde ho bestemora si Anike Adisa, som ho sa hadde «lært meg mange viktige livslekser». Ho nemnde også skodespelaren Albert Finney, som inspirerte henne til å søkje RADA; kollegaen og tidlegare læraren hennar ved RADA, William Gaskill; Paul Newman, som ho beundra både for skodespelet og for det filantropiske arbeidet sitt gjennom Newman's Own; og Oprah Winfrey, som ho omtalar som «ei superkvinne».
Mosaku flytta til Los Angeles i California i 2018, og gifta seg med den amerikanske talent- og litterære manageren Tash Moseley to år seinare. Dei fekk ei dotter i 2024, og Mosaku kunngjorde ved Golden Globes-utdelinga 2026 at ho venta sitt andre barn. Mosaku har også teke undervisning i joruba-språket sidan 2020.
Politiske syn Under den andre presidentperioden til Donald Trump kritiserte Mosaku fleire gonger innvandringspolitikken til administrasjonen. I eit intervju med The Sunday Times i februar 2026 sa ho at ho ikkje klarte å feire Oscar-nominasjonen sin på grunn av dødsfall knytte til føderal innvandringshandheving i Minnesota, og skildra den politiske situasjonen som «verkeleg dystopisk».
Kjelder
Denne artikkelen bygger på «Wunmi Mosaku» frå , den 17. mars 2026.
Bakgrunnsstoff
Kategori:Britiske skodespelarar Kategori:Nigerianske skodespelarar