Johann Sigismund Kusser () var ein tysk kapellmeister og komponist som verka i fleire land i Europa.
Liv og virke Johann Sigismund var son av ein evangelisk kantor i Bratislava. I 1674 flytta familien til Stuttgart. To år seinare drog Kusser til Paris og Versailles, der han fekk god kjennskap til den franske barokkmusikken og opplæring i komposisjon av den franske hoffkomponisten Jean-Baptiste Lully. Etter seks år i Paris verka Kusser ved hoffa i Baden-Baden og Ansbach, før han i oktober 1683 la ut på ei reise gjennom Tyskland.
I 1690 blei han den fyrste kapellmeisteren i det nye Opernhaus am Hagenmarkt i Braunschweig. Året etter gifta han seg med Hedwig Melusine von Damm, som var dotter av ein rådsherre i Braunschweig. Medan han var i byen, skreiv Kusser åtte operaer som utvida det italienskdominerte repertoaret til operahuset. På grunn av usemjer med librettisten og hoffdiktaren Friedrich Christian Bressand, flytta Kusser til Hamburg og arbeidde ved Oper am Gänsemarkt.
Mot slutten av 1695 forlet Kusser Hamburg og var blant anna verksam i Nürnberg og Augsburg, før Eberhard Ludvig av Württemberg i 1699 tilsette han ved hoffet i Stuttgart. Året etter blei Kusser utnemnd til hoffkapellmeister.
På slutten av 1704 flytta han til London, der han arbeidde som privatlærar og komponist. Han reiste vidare til Dublin i 1707 og blei i 1711 «Chappel-Master of Trinity College». I 1716 blei han utnemnd til «Chief Composer» og «Master of the Music, attending His Majesties State in Ireland».
Kusser påverka den etterfølgjande generasjonen komponistar, som Reinhard Keiser, Johann Mattheson, Georg Philipp Telemann, Christoph Graupner, Georg Caspar Schürmann og Georg Friedrich Händel, men blir sjølv sjeldan spelt no.
Kjelder
Arrey von Dommer: «Kusser, Johann Sigismund». I Allgemeine Deutsche Biographie (ADB). Bind 4, Duncker & Humblot, Leipzig 1876, s. 535–537. Klaus Zelm: «Kusser, Johann Sigismund.» I Neue Deutsche Biographie (NDB). Bind 13, Duncker & Humblot, Berlin 1982, ISBN 3-428-00194-X, s. 342 f. (digitalisering).
Denne artikkelen bygger på «Johann Sigismund Kusser» frå , den 26. september 2026.
Bakgrunnsstoff Litteratur Johannes Wiesner, Kusser, Johann Sigismund, i Horst-Rüdiger Jarck, Dieter Lent o.a. (red.): Braunschweigisches Biographisches Lexikon. 8. bis 18. Jahrhundert, Braunschweig 2006, ISBN 3-937664-46-7, s. 421. Johann Georg Walther (1732) Musicalisches Lexicon, Leipzig, s. 189. Nettstader
Kategori:Folk frå Bratislava Kategori:Operakomponistar Kategori:Barokkomponistar Kategori:Tyske komponistar Kategori:Komponistar frå 1600-talet Kategori:Komponistar frå 1700-talet