Ana María Botella Serrano (Madrid, 23 de julh de 1954) es una politiciana espanhòla del Partit Popular. Foguèt cònsol màger de Madrid, entre los ans 2011 e 2015, sent la primièra femna a ocupar aquela foncion. Es maridada amb José María Aznar que foguèt primièr ministre del govèrn espanhòl de 1996 a 2004. Se faguèt conéisser mondialament per sa marrida practica de l'anglés e sos problèmas de compreneson d'aquesta lenga durant la candidatura de Madrid als Jòcs Olimpics en setembre de 2013, e venguèt aital un dels tèmas mai recurrents de galejadas sus Twitter.
Biografia Ana Botella nasquèt a Madrid en 1954 dins una familha amonedada de la capitala espanhòla. Son paire, Ernesto Botella Pradillo, èra un engenhaire industrial e sa maire, Ana María Serrano Sancho-Álvarez, èra la filha d'un mètge famós. Aguèron tretze enfants que Ana Botella n'es l'ainada e tres d'aqueles seguiguèron los passes de la sòrre granda en se far una carrièra politica. Faguèt los estudis primaris e segondaris dins un collègi religiós de l'airal, las Madres Irlandesas. Puèi partiguèt a l'Universitat Complutense de Madrid ont estudièt lo drech. En 1977 se maridèt amb José María Aznar e amassa aguèron tres enfants que los ainats, en seguir la tradicion espanhòla, recebèron los noms de sos parents: José María, Ana e Alonso. Passèt un concors per venir foncionària e aprèp l'obtencion d'aqueste trabalhèt dins divèrsas administracions publicas coma lo Ministèri d'Interior espanhòl, lo Govèrn Civil de Logroño, lo Ministèri de Trabalhs Publics, la Delegacion de Finanças de Valladolid e mai lo Ministèri de Finanças.
Se consagrèt puèi a la politica dins la formacion conservadora, lo Partit Popular Espanhòl. En 2003 foguèt elegida conselhièra municipala de Madrid, e designada coma segonda adjoncha del cònsol, Alberto Ruiz-Gallardón.
Categoria:Naissença a Madrid Categoria:Naissença en 1954