Lo prefècte dau pretòri èra un oficier superior de l'armada e de l'administracion romana durant lo periòde imperiau. Creada per August, la foncion èra reservada ai membres de l'òrdre equestre. A l'origina, lo prefècte dau pretòri èra lo comandament de la garda pretoriana a Roma. A partir dau sègle II, leis emperaires prenguèron l'abitud de nomar dos prefèctes dau pretòri que sei poders militars fuguèron estenduts a la quasi totalitat dei fòrças armadas romanas. Durant lei sègles II e III, lei prefèctes dau pretòri èran sovent lei segonds personatges pus importants de l'Empèri après l'emperaire. Sei missions contunièron d'evoluir e recebèron mai e mai frequentament la gestion d'un ensems de províncias. Aquò menèt a una multiplicacion progressiva dau nombre de prefèctes dau pretòri durant lo periòde de la Tetrarquia e la foncion venguèt pauc a pauc mai e mai administrativa. Aquela evolucion s'acabèt durant lo rèine de Constantin que suprimiguèt lo ròtle militar dei prefèctes. Pasmens, la foncion, desenant purament civila e administrativa, contunièt d'existir fins ai sègles VI e VII dins certanei regions de l'Empèri. Lo títol fuguèt tanben acordat a de rèis « barbars » (francs, visigòts, vandals...) per mantenir l'illusion juridica d'una contuniacion de l'Empèri Roman dins lei províncias perdudas après la casuda de l'Empèri d'Occident.
Liames intèrnes
Empèri Roman Garda pretoriana Òrdre equestre
Bibliografia
Michel Absil, Les préfets du prétoire d'Auguste à Commode : 2 avant Jésus-Christ, 192 après Jésus-Christ, De Boccard, 1997, 293 p. Sigfreid J. de Laet, « La préfecture du prétoire sous le Haut-Empire et le principe de la collégialité », Revue belge de philologie et d'histoire, vol. 22, n° 1 e 2, 1943, pp. 73-95. Sigfreid J. de Laet, « Les pouvoirs militaires des Préfets du Prétoire et leur développement progressif », Revue belge de philologie et d'histoire, vol. 25, n° 3,4, 1946, pp. 509-554.
Nòtas e referéncias