Ij Righeira a son na formassion musical piemontèisa fondà da Johnson Righeira (Stefano Righi) e Michael Righeira (Stefano Rota).
J'achit
Tut a l'é nàit a Turin a la fin ëd j'ani '70. Dël 1981 Johnson Righeira a l'ha fàit sò prim disch, ciamà Bianca Surf, ma a l'é stàit dël 1983 ël sucess pì grand con ël sìngol Vamos a la Playa (prim ant la classificassion për set ësman-e e ëd gran sucess ëdcò an Anghiltèra e an d'àutri pais).
Dël 1983 la formassion a fa seurte No tengo dinero e dël 1984 Hey Mama.
Dël 1985 a l'han vagnà 'l Festivalbar con L'estate sta finendo, canson con un test motobin diferent da cole fàite fin a col moment-lì.
Famos për soe canson e për sò stil vreman dròlo, ij doi frèj a l'han ëdcò partecipà a San Remo dël 1986 con Innamoratissimo e a son ruvà ant la posission ch'a fa quìndes. Sempre dël 1986 a l'han scrivù la canson Rimini splash down peui butà ant ël film Rimini Rimini.
La cobia a l'é dësblasse dël 1988 dòp la surtìa dël sìngol Compañero. Dël 1989 Johnson a l'ha realisà na version acid-house ëd Yes i know my way, un clàssich ëd Pino Daniele.
Tornà ansema dël 1998, ij Righeira dël 2001 a l'han realisà un EP con vàire version ëd soe veje canson e a l'han ëdcò colaborà con la formassion Statuto ant la canson Sole, mare.
Dël 2007 a l'han publicà un neuv àlbom, Mondovisione, che a l'ha avù assé 'd sucess.
Discografia
Àlbom 1983 Righeira (CGD) 1985 Bambini Forever (CGD) 1992 Uno Zero Centomila (RCA) 2007 Mondovisione (Saifam)
Sìngol 1981 Bianca surf 1983 Vamos a la playa 1984 No tengo dinero 1984 Tanzen mit Righeira 1984 Hey Mama 1985 L'estate sta finendo 1986 Innamoratissimo 1986 Italians à go-go 1987 Bambini Forever 1987 Oasi in città 1988 Compañero 1989 Garageamos 1990 Ferragosto 1992 Uno Zero Centomila 2001 2001 Vamos a la playa 2007 La Musica Electronica
Categorìa:Mùsica legera