Ilex aquifolium
Descrission A l'ha na còma a còno, s-ciassa, soens con dij branch torzù. A l'ha dij frut ross e dle feuje sempevërde, ovaj, gorëgne, pì ciàire da sota. Cole anferiore e cole dij but neuv a l`han le bordure crispà con dje spin-e, antant che cole pì an àut a l'han ij bòrd pì regolar. La scòrsa a resta vërda për na desen-a d'agn, peui a ven grisa, goernand-se però sempe seulia.
Le fior, ch'a së s-ciàiro a la prima, a son cite, bianche, con quatr làver, radunà an cite partìe.
Distribussion A chërs fin-a vers ij 1000 méter d'autëssa.
Notissie Ëd sòlit as treuva coma busson, bele s'a peul rivé a n'autëssa ëd na desen-a ëd méter. A chërs motobin dasiòt e a peul rivé a vive dle senten-e d'agn. A-j piaso ij teren fresch, soens ëdcò coj pien ëd ròche.
Na vira le feuje e la scòrsa a j'ero dovrà për combate la frev. Ij frut a son da consideresse tòssi, bele che chèich osej a-j mangio.
Ël bòsch, tënner e bianch, a l'era dovrà për dij travajòt d'artisanà, tanme la fabricassion dij tòch ëd jë scach. Ël làur ëspinos a l'é dovrà për dij but ornamentaj; as prësta a esse poà ëd fasson da fene na cioenda.
Arferiment bibliogràfich për chi a veul fé dj'arserche pì ancreuse Ilex aquifolium L.