Anton Maria Lamberti (Venexia, 12 fevrer 1757 – Belun, 1832) el xe stà un scritor e poeta veneto.
Console dei Cavalieri de Malta a Venexia, co xe cascà la Republica el se ga ritirà a Belun (dove el xe morto inte el 1832) con un modesto inpiego. El ga scrito assè in lengua venexiana: gran parte de la so produzion in versi la xe rancurà inte i tri volumi de le Poesie (1817).
Tra le so poesie le pi conossiùe le xe le so canzonete, orechiàbiłi e maliziose, la pi famosa de le quali la xe La biondina in gondoleta (1788), messa in musica da Johann Simon Mayr.
El ga scrito anca varie malinconiche composizion de gusto arcadico, che le se adata ben al tramonto de Venexia. L'era anca un acuto osservador de costume (alcuni so inediti i xe stai publicà col titolo de "Ceti e classi sociali del '700" inte el 1959).
El ga tradoto in venexian un poche de poesie in sicilian scrite da Giovanni Meli.
Altri progeti
Categoria:Scritori venesiani Categoria:Poeti venesiani Categoria:Leteratura veneta