Venezia, la luna e tu el ze un film de'l 1958. Inte el 1964 el ze stà riedità co'l titoło I due gondolieri.
Trama Bepi, el cui mistier el ze gondołier, noviso de Nina, no'l renonsia a łe só aventure co done foreste, ch'el mena onji dì drento ła só góndoła.
Un dì rizirando ła sità el comunica a tute łe só bełe de Venesia che'l se spozarà co ła Nina. 'Sto fato el simenta ła còłara de tute łe venesiane (una de 'st'altre che ła zbate el tapeo so'l Canal Grando inguràndoghe de èsar a'l só posto).
Da ła só futura muger ghe vien ordenà un ciaro veto: "Bepi, soło che łe vecie vogio véder inte ła to góndoła". A càuza de un conpromeso invese de inbarcar do veciete el ospita do bełe zóveni 'mericane.
Nina, senpre pì zełoza de'l só morozo, ła serca de vendegàrse, frecuentando da novo uno de i só spazemànti, Toni, fin cuando Bepi el resta incastrà co foreste americane che łe ło vol spozar.
Nina ła se convinse a spozar Toni, più fedełe e rasegurante ma inte'l fratenpo Bepi el ze bon de łibararse da łe do americane sidioze, anca se'l ze convinto de aver perso par senpre ła só novisa, el core a ła Cieza dove che ga da sełebrarse el spozałisio, venjindo a saver co zogia che in realtà Nina a ła domanda se ła vołeva spozar Toni, no ła ga avùo el coragio de dir el "si" che'l gavarìa canbià ła vita.
Donca ghe ze stada ła rapatumasion de Nina co Bepi, el matrimonio e ła vita de famegia, co ła Nina che no ła moła de seguir el marìo par far in modo de no subìr altri tradimenti.
Spasozo ze el personazo de Toni interpretà da Nino Manfredi che, in stiłe venesian, el diverte e el strasina el film co łe so zbefe e umiłiasion che Nina ła ghe dà.
Ła critica Gian Luigi Rondi su Il Tempo de'l 4 otobre 1958.
Linganbi foresti
Aprofondimento fotografico so'i loghi dove che xe xirà el film Archivio cinema ANICA
Categoria:Film itałiani Categoria:Film comedia