Chuan II d'Aragón (Medina del Campo, 29 de chunio de 1398 - †Barcelona, 19 de chinero de 1479) estió conde de Ribagorza (1425-1458), rei de Navarra (1425-1479) y rei d'Aragón, conde de Barcelona, rei de Valencia, rei de Mallorca y rei de Sicilia (1458-1479).
Yera fillo de Ferrando d'Antequera y d'Alionor d'Alburquerque. Succedió a su chermano Alifonso V en os territorios d'a Corona d'Aragón. En 1419 se casó con Blanca de Navarra estando proclamau rei de Navarra en 1425, anque yera la suya muller quí s'encargaba d'o gubierno de Navarra. Mientres, él aduyaba a su chermano con os afers d'a Corona d'Aragón dica la muerte d'Alifonso en 1458, cuan fue coronau rei d'Aragón y d'a resta de territorios d'a Corona, de fueras de Nápols, que pasó a mans d'o fillo d'Alifonso, Ferrando I de Nápols. Cuan morió Blanca de Navarra se casó con Chuana Henríquez.
En o suyo reinau habió dos guerras civils en os suyos territorios. A primerá estió la guerra civil en Navarra, a on s'enfrontinó a lo suyo primochenito Carlos de Viana en 1452, a quí redotó y desheredó. La segunda estió la guerra civil catalana (1462-1472) a on tenió l'aduya d'o rei Loís XI. Chuan heba de pechar a lo rei de Francia 200.000 doblons d'oro por l'aduya u entregar a Francia a isla de Cerdenya y lo Rosellón, como finalment escayeció.
Morió en Barcelona, lo 19 de chinero de 1479, y fue enterrau en o monesterio de Poblet.
Deixó lo Reino de Navarra a la suya filla Alionor de Foix y los territorios d'a Corona d'Aragón a lo suyo fillo Ferrando.
Vinclos externos
Árbol chenealochico
Categoría:Muertos en Barcelona Categoría:Naixius de Medina del Campo Categoría:Reis d'Aragón Categoría:Reis de Navarra Categoría:1398 (naixencias) Categoría:1479 (muertes)