A cuaga ( (Boddaert, 1785)) estió una subspecie d'a zebra común (E. quagga), enantes muito abundant, pero que s'extinguió en o sieglo XIX. Tenioron caracteristicament os cuerpos suyos sin de rayas por a contra d'a resta d'especies de zebras, y con a espalda y las hancas de color marrón royisca.

Tenioron as rayas restrinchidas só que en a cabeza, o cuello y os costatos, con a espalda y o culo de color marrón y las patas blancas de tot. Todas estas diferencias respectives a las otras zebras facioron que orichinalment la cuaternasen drento d'una altra especie diferent, en os tiempos d'a suya primera clasificación en o 1788. Actualment, as cuagas han estato los solos animals extinguitos d'os que se n'ha puesto quitar lo DNA, permitendo asinas que se demostrase que heban estato siempre una subspecie mas d'a zebra común.

Distribución

As cuagas formoron siempre rebanyos en o sud de Sudafrica, mas que mas en a provincia d'o Cabo. O suyo nombre proviene d'a luenga d'o pueblo khoi (os hutentoz) y ye onomatopeyico en a suya orichen, derivato d'o relincar carateristico d'estas bestias.

As cuagas se cazoron furament con a plegada d'os primers holandeses por a suya carne y la suya piel. En o sieglo XIX, a colonización de l'interior d'o continente por os bóers que no quereban a soberania inglesa en a colonia fizo que se matasen cientos d'eixemplars, enmarcada en un plan pa exterminar os animals salvaches d'a comarca pa emplegar as praderas como sostento pa la ganadería. A población d'estos animals en libertat la facioron descender profusament en aquels anyos, dica que la subspecie yera acotolada de raso en Sudafrica en l'anyo 1870. O 12 d'agosto de 1883 morió en o parque zoolochico d'Amsterdam o zaguer eixemplar d'este animal, perdendo-se ta cutio la subspecie con él.

A disponibilidat d'o DNA d'a cuaga no ha feito que s'emprencipase garra prochecto pa recuperar-la meyant a clonación. Manimenos, han feito operativo en Sudafrica, dende 1987, un prochecto de cría selectiva d'eixemplars d'una subspecie parellana en a que se mira de quitar-ne los eixemplares naixitos con carateristicas mas similars a la cuaga y reproducir-los d'entre ellos. O Prochecto Quagga lo emprencipón con 205 zebras criyaderas d'o vecino Parque Nacional d'Etosha, en Namibia.

Vinclos externos

Pachina oficial d'o Prochecto Quagga

quagga quagga Categoría:Animals extintos