A Casa d'os Morlans, situata en a plaza de Sant Carlos d'a ciudat de Zaragoza, ye un edificio d'o sieglo XVI d'o cual se desconoixen tanto lo suyo autor como lo suyo primer propietario. Tanto M. de la Sala Valdés como José Camón Aznar han apuntato a posibilidat de que fuese propiedat d'os Morlans, familia d'insignes churistas y artistas que teneban ya cuantas casas en ixa mesma zona, aunque iste dato encara no ha estato confirmato documentalment. Podió ser construita por un d'éls, Gil Morlans lo Viello.
O solo dato confirmato ye que a decoración en cheso d'a suya frontera prencipal remató de fer-se en l'anyo 1555. Ista frontera, feita en ladriello sobre un calcil de piedra picata, ye o solo que se conserva d'a construcción orichinal, ya que l'interior d'a casa ha estato renovato de tot.
A frontera ye dividita en tres pisos. A planta baixa tien una dentrata ubierta con un arco de meyo punto, con brancas de piedra, y cuatro banos adintelatos y enreixatos. A planta noble presenta banos adintelatos y flanquiatos por estipites que sostienen frontons semicirculars y triangulars. En a planta superior bi ha una clasica galería d'arcos de meyo punto doblatos, rematata por un rafe.
A decoración se concentra arredol d'os banos d'a planta noble, a on pueden veyer-sen diferents motivos como feguras d'anchels garlandas y vechetals.
Vinclos externos
Referencias Declaración de Bien d'Intrés Cultural publicata en o BOA nº 89, de calendata 29 de chulio de 2002.
Categoría:Biens d'Intrés Cultural d'a Comarca Central Categoría:Palacios de Zaragoza Categoría:Molimentos de Zaragoza