Võ Nguyên Giáp,Encara que l'apelliu, que se fica debant d'o nombre seguntes o sistema onomastico vietnamita, ye Võ, a historiografía occidental considera Giap como lo suyo apelliu. naixiu d'An Xá (provincia de Quảng Bình) en 1911 u 1912 y falleixiu lo 4 d'octubre de 2013 en Hanoi (Vietnam), ye un militar vietnamita, activo mientres a Guerra d'Indochina contra Francia y mientres a Guerra de Vietnam contra Vietnam d'o Sud y os Estaus Unius, que plegó enta lo grau de cheneral y estió lo vencedor de l'exercito francés en 1954 en a batalla de Điện Biên Phủ, que remató la Guerra d'Indochina con a redota francesa. Tamién prenió parte en a Segunda Guerra Mundial en a Resistencia contra l'Exercito Imperial Chaponés.
Primeras anyadas Võ Nguyên Giáp naixió arredol de 1911 u 1912 en a localidat d'An Xá (provincia de Quảng Bình, en ixas calendatas parte d'Annam, en a colonia francesa d'Indochina francesa), fillo d'un mandarín. Dende muit choven, con 14 anyadas, ya se manifestaba contra la presencia colonial francesa en o suyo país.
Estudió en un liceu en luenga francesa, y partecipó en as actividaz d'o movimiento comunista en Vietnam dende os anyos 1930. Estudió Historia, Dreito y Economía en Huế y Hanoi, y uno d'os suyos profesors en ista zaguera ciudat estió lo poeta d'a Reunión Raphaël Barquisseau. En 1937 Giáp se convertió en profesor en a escuela Thang-Long de Hanoi, y en 1939 pasó a militar en o Partiu Comunista.
A Segunda Guerra Mundial En 1939, dimpués d'o Pacto Molotov-Ribbentrop entre la Unión Sovietica y lo Tercer Reich, o Parti Communiste Français fue declarau ilegal, y los comunistas d'Indochina fueron tamién ilegalizatos. Giáp partió ta China,a on se convertió en aduyant de Ho Chi Minh. En aviento de 1944, estió lo fundador de l'Exercito Popular de Vietnam.
En 1941, l'Exercito Imperial Chaponés heba ocupau Indochina, como parte d'os suyos acuerdos con a Francia de Vichèi, que yera aliada d'o Tercer Reich, y bi mantenió l'administración civil francesa, encara que subordinata a las necesidaz militars chaponesas. Sindembargo, lo 9 de marzo de 1945, os chaponeses facioron un golpe y prenioron o poder en a colonia, desplazando a l'administración francesa, y Giáp aprofitó ta millorar a recluta de miembros ta lo Viet Minh, luitando contra os chaponeses.
A Guerra d'Indochina Dimpués d'a rendición d'o Chapón en 1945, Francia miró de recuperar o suyo poder colonial en a Indochina francesa, encara que se i oposó lo Viet Minh, con armas estausunidenses, amás d'as armas incautadas a l'Exercito Imperial Chaponés, y con l'aduya d'instructors militars sovieticos, y prencipió una larga luita colonial de guerrillas, en a cual os vietnamitas teneban d'a suya parte o suyo entrenamiento mientres a guerra contra os chaponeses. Estió la clamada Guerra d'Indochina.
En 1946 Giáp fue nombrau ministro d'Esfensa de Vietnam d'o Norte, y estió lo director d'as operacions militars contra l'exercito francés, incluyindo-ie la batalla de Điện Biên Phủ en 1954, que remató a guerra con a redota francesa, reconoixida en os Acuerdos de Chinevra que reconoixeban a independencia de Vietnam, encara que o país quedó dividiu entre lo Vietnam d'o Norte, con influencia comunista y Vietnam d'o Sud, con influencia estausunidense, en o marco d'a Guerra Fría.
A Guerra de Vietnam Con a escalada d'a tensión en a rechión, en 1960 esclató la Guerra de Vietnam, que afrontó d'una parte a Vietnam d'o Norte, con aduya de China y la Unión Sovietica, contra Vietnam d'o Sud, con aduya militar estausunidense, d'atras nacions occidentals, como Australia u Reino Uniu, y beluns d'os aliaus estausunidenses en Asia, como Corea d'o Sud. En Vietnam d'o Sud bi actuó una guerrilla comunista, clamada Vietcong.
Giáp estió lo director d'a politica militar de Vietnam d'o Norte, y la guerra remató en 1975 con a redota de Vietnam d'o Sud, a qui en ixas calendatas ya heban albandonau os suyos aliaus estausunidenses.
A reunificación de Vietnam Dende 1975, Vietnam remanió reunificau, y Võ Nguyên Giáp estió lo ministro d'Esfensa d'o país dica la suya dimisión en 1980.
Se veiga tamién Batalla de Điện Biên Phủ.
Vinclos externos
Referencias
Categoría:Comunistas de Vietnam Categoría:Militars d'a Segunda Guerra Mundial Categoría:Militars de Vietnam d'a Guerra d'Indochina Categoría:Militars de Vietnam d'o Norte d'a Guerra de Vietnam Categoría:Ministros de Vietnam Categoría:Muertos en Hanoi Categoría:Naixiu d'An Xá Categoría:1911 (naixencias) Categoría:2013 (muertes)