Alrisha o Alrischa (α Psc / α Piscium / 113 Piscium) ye una estrella binaria asitiada na constelación de Piscis. El so nome provién del árabe y significa "cuerda". Alcuéntrase a 139 años lluz del Sistema Solar.
Les componentes del sistema son dos estrelles blanques de la secuencia principal anguaño separaes 1,8 segundos d'arcu. La estrella principal, Alrisha A (HD 12447), tien magnitú aparente +4,33 y ye de tipu espectral A0; la so compañera, Alrisha B (HD 12446), de magnitú +5,23, pertenez a la clase espectral A3m. La primera tien una temperatura de 9500 K y ye 31 vegaes más lluminosa que'l Sol. La segunda ye 900 K más fría que la so compañera y ye 12 vegaes más lluminosa que'l Sol. Les sos mases respeutives son 2,3 y 1,8 vegaes mayores que la masa solar. Nenguna de les dos estrelles xira apriesa y como resultáu d'ello son estrelles químicamente peculiares. Alrisha A ye una estrella Ap con un campu magnéticu unes 1000 vegaes mayor que'l campu magnéticu terrestre; Alrisha B, pela so parte, ye una estrella con llinies metáliques o estrella Am.
El periodu orbital del sistema ye cimeru a los 700 años. La distancia media ente les dos estrelles ye de 120 UA, pero la escentricidá de la órbita fai que la separación ente elles varie ente 50 y 190 UA; el máximu acercamientu va producise alredor del añu 2060. De la mesma, una o les dos estrelles pueden ser binaries espectroscópicas.
Referencies
Alrisha A (SIMBAD) Alrisha B (SIMBAD) Alrescha (Stars, Jim Kaler)
Categoría:Estrelles Categoría:Estrelles blanques de la secuencia principal Categoría:Estrelles binaries Categoría:Constelación de Piscis