FF Aquilae (FF Aql)FF Aquilae (SIMBAD) ye una estrella variable na constelación del Águila de magnitú aparente media +5,31. La midida de la so paralax llevada a cabu col Telescopiu espacial Hubble (2,81 ± 0,18 milisegundos d'arcu) dexó calcular la so distancia al Sistema Solar, aproximao 1160 años lluz.
FF Aquilae pertenez al grupu de les cefeides, clase de variables pulsantes qu'amuesen modulaciones periódiques na so lluminosidá desaxeradamente regulares, siendo Mekbuda (ζ Geminorum) y η Aquilae —esta postrera tamién na constelación de l'Águila— dos de les sos más conocíes representantes. El rellumu de FF Aquilae bazcuya ente la magnitú +5,18 y +5,68 a lo llargo d'un periodu de 4,470916 díes. La estimación del so diámetru angular (0,48 milisegundos d'arcu), xunida a la distancia calculada a partir de la so paralax, da como resultáu un diámetru real aproximao 18 vegaes más grande que'l del Sol. Esti valor nun ye escesivu pa una estrella de les sos carauterístiques; como exemplu, η Aquilae tien un diámetru unes 60 vegaes mayor que'l diámetru solar. FF Aquilae tien una masa averada de 4,5 mases solares y una edá de 50 ± 4 millones d'años.
La metalicidá de FF Aquilae ye comparable a la del Sol ([Fe/H] = +0,02). Cobre, cinc y itriu son casi'l doble d'abondosos que nel Sol, pero elementos como carbonu y magnesiu son deficitarios ([C/H] = -0,26).
FF Aquilae ye, amás, una binaria espectroscópica que'l so periodu orbital ye de 1432,4 díes. La compañera paez ser una estrella de la secuencia principal de tipu F1V con una masa de 1,6 mases solares, separtada de la estrella principal unes 4,5 UA.
Ver tamién Llista d'estrelles variables
Referencies
Categoría:Estrelles Categoría:Superxigantes marielles Categoría:Estrelles variables Categoría:Variables Cefeides Categoría:Estrelles binaries Categoría:Constelación d'Aquila