Y Sextantis (Y Sex / HD 87079 / HIP 49217)Y Sex (SIMBAD) ye una estrella variable de la constelación de Sextans, el sestante. Ta asitiada al otru llau del ecuador celeste al respeutive de α Sextantis, a pocu menos de 2º d'ésta. Alcuéntrase a 361 años lluz del Sistema Solar.
Y Sextantis ye una binaria de contautu de tipu espectral F5-F6 o F8V. Nesti tipu de binaries cercanes, por cuenta de la so proximidá, les dos estrelles comparten les sos capes esteriores de gas, anque nel casu de Y Sextantis el contautu ye namái marxinal. Les temperatures respeutives de les componentes son 6650 y 6448 K. La más caliente ye 4,3 vegaes más lluminosa que'l Sol y tien un radiu de 1,57 radios solares. Ye un 50% más masiva que'l Sol ente que la so compañera apenes tien el 2% de la masa solar. La rellación ente les mases de dambes componentes, q, ye igual a 0,195. La estrella menos caliente ye llixeramente menos lluminosa que'l Sol y el so radiu equival al 80% del radiu solar.
Clasificada como variable W Ursae Majoris, la variabilidá de Y Sextantis foi reparada per primer vegada por Cuno Hoffmeister en 1934. El so rellumu fluctúa ente magnitú aparente +9,83 y +10,21 a lo llargo del so periodu orbital de 0,4198 díes (10,075 hores).Y Sextantis (General Catalogue of Variable Stars) Reparóse un amenorgamientu del periodu col tiempu, lo que s'interpretó como tresferencia de masa dende la estrella más masiva escontra la so compañera, o como perda de masa y de momentu angular per parte del sistema. Coles mesmes, esisten dos oscilaciones periódiques adicionales, la primera de 51,22 años —con una amplitú de 0,0218 díes— y la segunda de 32,10 años. Estos valores suxeren la presencia d'un tercer oxetu nel sistema —de tipu espectral envaloráu M3-M4 y de 0,3 mases solares— y la posibilidá de qu'esista un cuartu oxetu de menor masa. Una esplicación alternativa ye que dambes estrelles tengan ciclos magnéticos de resultes de la so rápida rotación.
Ver tamién Llista d'estrelles variables
Referencies
Categoría:Estrelles Categoría:Estrelles binaries Categoría:Estrelles variables Categoría:Constelación de Sextans