Zeta Delphini (ζ Del / 4 Delphini / HD 196180 / HR 7871)Zeta Delphini (SIMBAD) ye una estrella na constelación del Delfín. De magnitú aparente +4,66, ye la sesta más brillosa dientro de la so constelación.
Zeta Delphini ye una estrella blanca de la secuencia principal de tipu espectral A3V y 8336 K de temperatura superficial. Munches de les estrelles brilloses del cielu nocherniegu son estrelles asemeyaes, siendo Siriu (α Canis Majoris) y Vega (α Lyrae) probablemente les más conocíes. Zeta Delphini, con una lluminosidá 65 vegaes mayor que la lluminosidá solar, ye intrínsecamente más lluminosa que cualesquier d'elles; namái'l so mayor alloña al respective de nós, 227 años lluz, fai que'l so rellumu aparente sía menor. Les sos carauterístiques físiques son más asemeyaes a les de Chertan (θ Leonis) o Skat (δ Aquarii), pero a diferencia de la primera, tien una alta velocidá de rotación de siquier 96 km/s —113 km/s según otru estudiu—, unes 50 vegaes más rápida que la del Sol. Tien una masa 2,5 vegaes mayor que la del Sol y consumió el 91% de la so vida como estrella de la secuencia principal.
La bayura de los distintos elementos químicos en Zeta Delphini presenta ciertes diferencies respeutu al Sol. Magar el so conteníu relativo de fierro ye práuticamente igual al del Sol ([Fe/H] = -0,05), el nivel de sodiu ye 3,6 vegaes más altu que na nuesa estrella. Nel otru estremu, ye deficiente n'elementos como bariu y estronciu; esti últimu metal ye cuatro veces más escasu que nel Sol.
Referencies
Categoría:Estrelles Categoría:Estrelles blanques de la secuencia principal Categoría:Constelación de Delphinus