María Teresa Villaverde , conocida como "Maruxa" o "Tuxa", foi una escritora maliayesa nacida nel Palaciu de Villaverde o de Vista Hermosa de Tornón. Estudió nel Colexu de Carmelites d'Uviéu, foi una persona d'idees carlistes y relixoses. Escribió delles coses en castellanu, pero sobre too utilizó la llingua asturiana na so creación lliteraria, fundamentalmente en versu. Mantuvo durante años collaboraciones periodístiques na prensa llocal (Villaviciosa, Villaviciosa hermosa y Pan y paz) y na revista Asturies del Centru Asturianu de Madrid y de Buenos Aires. Foi la homenaxada na Selmana de les Lletres Asturianes de 2020.
Obra Les sos primeres creaciones dátense a primeros de la década del sieglu XX y faen referencia a escursiones y llugares visitaos pola autora. Amiga l'alma (1914) ye probablemente la so primera pieza en n'asturianu. Recuerdos, Tornón, Consolatrix aflictorum son otres composiciones que foron publicando nos años siguientes. Durante les navidaes aprendía a los neños de la parroquia de Tornón llargues composiciones d'alredor de cien versos, que güei dellos d'aquellos rapacinos, ya añosos, mantienen vives na so memoria, casu de Diálogu navideñu o Los Reis Magos. Ente les composiciones teatrales citaremos El balcón de la Reina Lindahalaja, que foi representada en vida, llegando a encarnar ún de los sos personaxes.
Ye interesante la rellación que mantuvo col so primu Francisco Balbín de Villaverde, Xiquín de Villaviciosa, asentáu en Buenos Aires, y tamién autor d'un llibru de poemes n'asturianu: De la mio Asturies (1926). Con él mantuvo una amplia rellación epistolar en versu asturianu que salió a la lluz en distintos medios de la dómina como la entitulada Pa Xico d'Onón, mio primu.
Nel añu 1928 publícase la obra Villaviciosa y su progreso, nel que María Teresa inclúi un interesante artículu tituláu Algo sobre el bable, nel qu'aborda la historia de la llingua asturiana y les sos principales carauterístiques, reafirmando la so filiación llatina. Ye un cantu a la so llingua materna:
Morrió en xunu de 1934 nun tráxicu accidente de coche -que segaría al empar la vida de so madre y una hermana- en Figares (Sariegu). Los sos restos descansen na capiella-panteón familiar del cementeriu de Tornón.
Referencies
Enllaces esternos
Categoría:Persones de Villaviciosa Categoría:Escritores d'Asturies Categoría:Escritores en castellanu Categoría:Escritores n'asturianu