Jesús Valeiro Gómez, coñecido como Antonio ou Calias, nado en Vixoi (Bergondo) en 1915 e finado na mesma parroquia o 5 de decembro de 1950, foi un guerrilleiro antifranquista galego.
Traxectoria Labrego. Co golpe de Estado do 18 de xullo de 1936 fuxiu e botouse ao monte. Presentouse ás autoridades na Casa de Reclusión da Coruña o 25 de xuño de 1940. Incorporouse ao Rexemento de Artillaría nº 48 da Coruña e o 21 de marzo de 1941 foi destinado ao Batallón Disciplinario nº 25 en Meluza (Tetuán). Permaneceu no batallón ata que foi licenciado o 13 de febreiro de 1942. Regresou á súa casa e o 29 de xuño de 1946, ao ter noticias de que dous veciños foran detidos por complicidade cos guerrilleiros, botouse ao monte.
Militante do PCE, foi xefe militar do Destacamento Santiago Álvarez con José Antonio Cortiñas Blas como responsable político. Dende 1947 foi responsable político do Destacamento Enrique Lister da IV Agrupación do Exército Guerrilleiro de Galicia, substituíndo a Francisco Rey Balbís cando asumiu o a xefatura da IV Agrupación. O Xulgado Especial de Accidentes Ferroviarios da Oitava Rexión Militar publicou en setembro de 1948 unha requisitoria contra el, Francisco Rey Balbís, José Antonio Cortiñas e Antonio López Arias."Requisitoria", La Voz de Galicia, 9-9-1948, p. 3. A requisitoria volveu repetirse ao mes seguinte cos engadidos de José María Díaz Pan, Emilio Claudio Díaz, Enrique Ferreirós Candamo, José Remuiñán Barreiro, José Pedreira de la Iglesia e José Blanco Núñez."Requisitoria", La Voz de Galicia, 20-10-1948, p. 2. A principios de novembro publicouse unha nova requisitoria contra el e Vicente Peña Tarrasa como encartados nas causas 457/48, 458/48 e 482/48 por atraco a man armada.El Ideal Gallego, 4-11-1948, p. 4.
Agochado dende 1949, foi delatado e morreu nun enfrontamento coas forzas represivas preto da casa familiar en Vixoi (Bergondo) o 5 de decembro de 1950, xunto coa súa moza María Amado Otero. Notas
Véxase tamén Bibliografía
Categoría:Guerrilleiros antifranquistas de Galicia Categoría:Nados en Bergondo Categoría:Finados en 1950 Categoría:Nados en 1915 Categoría:Personalidades de Galicia sen imaxes