Louis Braille, nado en Coupvray, a 40 km de París, o 4 de xaneiro de 1809 e finado o 6 de xaneiro de 1852 en París, foi un profesor francés famoso pola invención do sistema de escrita para cegos que tamén se chama braille. Ensinou Matemáticas e Música entre outras materias. Pola súa orixe, o seu nome debe pronunciarse con elle e non con ele como se escoita ás veces. En francés, o ele duplo (ll) precedido dun i pronúnciase elle.
Na súa honra, o 4 de xaneiro celébrase o Día Mundial do Braille.
Traxectoria Louis BraillePronunciado [lu'i 'braj] en francés. naceu nunha familia humilde. Seu pai, Simon-René Braille, era talabarteiro: fabricaba apeiros de coiro para a labranza como as correas, cinchas, alabardas etc. Á idade de 3 anos perdeu a vista. Infectóuselle o ollo esquerdo nun accidente no taller do seu pai. A infección rematou por danarlle o ollo dereito tamén, provocándolle unha cegueira irreversible.
O seu pai facíalle textos en táboas con cravos para que aprendera a ler. Moi pronto, decidiron envialo a un centro para cegos en París: Centre des Jeunes Aveugles que levaba Valentin Haüy. Este protector da xente cega ideara un sistema de escrita en relevo que reproducía as letras tal como as escribimos con moldes. Con ese sistema de escrita, Braille aprendeu e ensinou no mesmo centro posteriormente matemáticas, música e outras materias.
Creación do Braille En 1829, inventou o sistema de escrita que leva o seu nome. En 1834, publica os detalles do seu método de escrita braille. As letras represéntanse con grupos de 6 puntos, aliñados en 2 columnas de 3 puntos. Cada letra represéntase por unha combinación única dalgúns destes puntos en relevo.
Para iso, inspirouse no sistema de Valentín Haüy (texto en relevo) e da escrita nocturna para uso militar de Charles Barbier. O sistema de Valentín Haüy tiña a dificultade da incomodidade para a escrita por parte dun cego; o de Charles Barbier tiña até 12 puntos e dificultaba a lectura ao facela máis lenta pero era moi practicábel na escrita para unha persoa invidente. O acerto de Louis estivo en reducir o número de puntos ao estritamente necesario para xerar suficientes signos para unha escrita apropiada e un tamaño que facilitase a lectura.
Morte Faleceu en París debido á tuberculose o 6 de xaneiro de 1852. Foi primeiro enterrado na súa aldea natal e trasladado posteriormente ao Panteón de Franceses Ilustres de París. Aínda así, polo seu valor simbólico, deixaron as súas mans nunha caixiña sobre a súa tumba no cemiterio do lugar.
Notas
Véxase tamén
Bibliografía Henri, P. (1952). La vie et l'oeuvre de Louis Braille: inventeur de l'alphabet des aveugles, 1809-1852. París: Presses Universitaires de France. Mellor, C. M. (2008). Louis Braille: Le génie au bout des doigts. París: Éditions du patrimoine.
Outros artigos Braille Cegueira
Ligazóns externas Revista Louis Braille ACAPO Páxina de Homenaxe a Luís Braille da UNED
Categoría:Nados en 1809 Categoría:Finados en 1852 Categoría:Nados en París Categoría:Finados por tuberculose Categoría:Persoas cegas Categoría:Inventores de Francia