Mastellone Hermanos S.A., coñecida principalmente polo seu nome comercial La Serenísima, é unha compañía arxentina dedicada á elaboración de produtos lácteos, con sede en General Rodríguez, na Provincia de Buenos Aires. Foi fundada por Antonino Mastellone en 1929 e, desde 2026, é propiedade de Grupo Arcor e da multinacional francesa Danone, a través dun acordo para adquirir o control total do paquete accionarial.
Comezou como unha pequena empresa de elaboración de queixos e medrou até converterse nunha das principais compañías do mercado lácteo arxentino. O nome La Serenísima foi tomado dun escuadrón de aviación italiano que participou na Primeira guerra mundial.
Pascual Mastellone, fillo do fundador, presidiu a compañía durante máis de cinco décadas, desde 1952 até 2013, cando deixou o cargo por problemas de saúde. Morreu en 2014. En 2018, Mastellone Hermanos tiña uns 3.500 empregados e rexistraba vendas por 900 millóns de dólares estadounidenses e procesaba máis de 3,2 millóns de litros de leite por día.
Historia
Desenvolvemento miniatura|esquerda|130px|Antonino Mastellone, fundador da empresa. Dirixiuna até a súa morte en 1952, cando foi sucedido polo seu fillo Pascual.
Antonino Mastellone, inmigrante italiano e mestre queixeiro procedente de Sardeña, chegou á Arxentina en 1925. Instalado en General Rodríguez, ao oeste de Buenos Aires, comezou a producir mozzarella e ricotta na súa casa. El mesmo distribuía os produtos en tren até Buenos Aires, onde os vendía nos barrios de La Boca, Barracas e San Telmo, zonas con forte presenza de inmigración italiana e consumidores habituais destes queixos.
miniatura|Camión de La Serenísima cara a 1935. A empresa comezou como fábrica de mozzarella e ricotta e adquiriu o seu primeiro vehículo de reparto en 1935.
Antonino Mastellone casou con Teresa Aiello o 26 de outubro de 1929, data que foi adoptada posteriormente como día oficial de fundación da empresa. En 1935 mercou o seu primeiro camión de reparto e en 1942 constituíu formalmente a sociedade. Chamou ao seu emprendemento La Serenísima en homenaxe a un batallón da aviación italiana da Primeira guerra mundial que, durante unha misión sobre Viena, lanzou panfletos a prol da paz no canto de bombas. O propio nome do batallón aludía á medieval República de Venecia, coñecida como La Serenissima.
En 1952 morreu Antonino Mastellone e a condución da empresa pasou a Pascual Mastellone. Cara a 1960, La Serenísima era unha das poucas compañías arxentinas que producían leite pasteurizado a gran escala, o que lle permitiu comercializalo durante todo o ano. En 1964 creou o seu propio laboratorio de investigación e converteuse nunha das primeiras empresas do país en informar datos nutricionais nos envases.
En 1978 Mastellone Hermanos adquiriu os dereitos da marca La Martona, fundada en 1889 e considerada a primeira empresa láctea da Arxentina. La Martona cesara as súas operacións ese mesmo ano, logo de ser declarada en quebra polas súas débedas. Con todo, Mastellone non relanzou produtos baixo esa marca até 2019, cando presentou unha liña económica de leite.
A empresa foi pioneira na venda de leite reducido en lactosa na Arxentina en 1984, consolidouse como líder no mercado do iogur —cuxo consumo local se duplicou entre 1983 e 1988— e introduciu o leite cultivado en 1988. En 1994 introduciu a produción orgánica de leite a grande escala no país e comezou a fortificar produtos con sulfato ferroso.
Ampliación da gama En 1994 La Serenísima comezou a vender zumes perecedoiros non procedentes de concentrado mediante unha sociedade con Tropicana Products, daquela propiedade de Seagram. A alianza combinaba a rede de distribución de produtos refrixerados de La Serenísima co negocio de zumes de Tropicana. A iniciativa foi impulsada por Pascual Mastellone e Mike Harbison, de Tropicana, e finalizou despois da compra de Tropicana por PepsiCo.
En 1996 Mastellone Hermanos asinou unha alianza con Danone para a fabricación, venda e comercializacion de iogures e sobremesas baixo a marca La Serenísima. Nos anos seguintes desenvolveu novos produtos para o mercado local, entre eles leite enriquecido con fitoesterois en 2000, zumes para nenos en 2001 e leite enriquecido con ácido linoleico en 2003. Tamén ampliou a súa actividade institucional, coa creación dunha área de impacto ambiental en 2002 e unha campaña de recadación para a Fundación Favaloro en 2003.
A comezos da década de 2000, La Serenísima procesaba máis de 4,8 millóns de toneladas de leite ao ano. Por medio da alianza con Danone, introduciu Activia no mercado arxentino en 2005. En xuño de 2009 informouse de negociacións para que Danone adquirise o 100 % de Mastellone Hermanos S.A., aínda que a débeda da empresa, estimada en 260 millóns de dólares, e a oposición atribuída ao expresidente Néstor Kirchner dificultaron as conversas.
Durante a década de 2010 a empresa lanzou novos produtos en alianza co Grupo Danone e con Cabrales, ademais doutras liñas derivadas do leite. En 2019 relanzou Armonía como segunda marca de menor prezo, con leite e doce de leite, alternándoa no mercado con La Martona como opción económica.
En setembro de 2024 Mastellone anunciou que preto do 63 % da súa subministración de enerxía procedía de fontes renovables, logo dun acordo con MSU Green Energy.
En 2025 Arcor e Bagley, sociedade vinculada a Arcor e Danone, anunciaron a intención de exercer unha opción de compra polo 51 % restante de Mastellone Hermanos, porcentaxe que aínda permanecía en mans da familia Mastellone e do fondo Dallpoint. Mastellone impugnou inicialmente a oferta por discrepancias sobre o prezo. En marzo de 2026 anunciouse o acordo para que Arcor e Danone adquirisen a totalidade da compañía, integrando as operacións de Mastellone co negocio lácteo refrixerado de Danone na Arxentina.
En abril de 2026 morreu José Mastellone, fillo menor de Antonino Mastellone e Teresa Aiello, poucos días despois de comunicarse a venda total da empresa. Segundo a prensa arxentina, era o último fillo vivo do matrimonio fundador e seguía ligado á planta de General Rodríguez.
Produtos A seguir recóllese unha lista de marcas e produtos fabricados ou comercializados por Mastellone Hermanos e polas súas marcas asociadas.
miniatura|Doce de leite «estilo colonial». miniatura|Doce de leite da marca La Martona.
Marca Produtos La Serenísima Leite, leite en po, leite con sabor a chocolate, doce de leite, manteiga, iogur, nata, leite combinado con zume de froita e queixo Actimel Iogures probióticos Armonía Leite e doce de leite Danette Sobremesas Danonino Iogur probiótico Finlandia Queixos, queixo crema e salsas Junior Leite combinado con zume de froita La Martona Leite, doce de leite e iogur Sense Leite combinado con zume de froita Ser Leite combinado con zume de froita, leite probiótico, iogures, iogures dietéticos e sobremesas dietéticas Serenito Sobremesas Vidacol Iogures probióticos Yogurísimo Iogur
Publicidade Na década de 1960 La Serenísima contratou a cociñeira Petrona C. de Gandulfo, coñecida pola publicación do seu libro El Libro de Doña Petrona en 1934, para elaborar receitas con queixos da marca. O resultado foi El Recetario de Doña Petrona, un folleto empregado como peza publicitaria da empresa.
En 1995 a compañía adquiriu un dirixible con fins publicitarios. A aeronave, fabricada pola empresa británica Airship Industries, medía 59 m de longo, 19 m de ancho e 20 m de alto. Estaba impulsada por dous motores Porsche e acadaba unha velocidade máxima de 100 km/h. A súa envolvente tiña capacidade para 63.000 m³ de helio e a autonomía de voo era de 17 horas.
O dirixible realizou varias viaxes pola Arxentina entre 1995 e o 22 de novembro de 1996, cando tivo que facer unha aterraxe de emerxencia por mor do mal tempo. O vento, duns 100 km/h, destruíu a aeronave, aínda que non houbo feridos. O expiloto de Fórmula 1 Carlos Reutemann, que se atopaba na zona no momento do accidente, colaborou na asistencia á tripulación.
Notas
Ligazóns externas
Sitio web oficial
Categoría:Empresas da Arxentina Categoría:Industria alimentaria