Bjarne Instanes () var ein norsk sivilingeniør.
Biografi
Etter vanleg skulegang i Ullensvang, gjekk Bjarne Instanes på Framnes folkehøgskule på Vikøy og deretter Voss landsgymnas før han vart ein av 150 norske ungdommar som fekk gratis studieplass i Sveits. Her blei han verande i tre år etter at han var blitt ferdig med utdanninga som sivilingeniør før han kom heim for å gjera militærtenesta som planleggjande ingeniør i Forsvaret i 1953.
I 1954 starta han som rådgjevar i firmaet Caspar Trumpy. Her fekk han ansvar for å teikna, berekna og kontrollera bygginga av Puddefjordsbrua. I 1960 starta han sitt eige rådgjevande ingeniørfirma som etter kvart voks til 70 tilsette. Det var Instanes som prosjekterte Ulriksbanen og Hangursbanen, Sør-Norge Aluminium på Husnes og ei lang rekkje andre prosjekt i Noreg og på Svalbard. I utlandet stod han bak brubygging i Malawi, bistand til fiskerinæringa i Gambia, flyplassbygging i Saudi-Arabia, UNICEF-oppdrag i Libanon, fiskeriprosjekt i Tanzania og planlegging av kolkaiar og eksport av ris i Vietnam. Han hadde også oppdraget med å byggja ein ny permanent forskingsstasjon for Norsk Polarinstitutt på Dronning Mauds Land på Sørpolen.
Bjarne Instanes var sterkt engasjert i utforminga av området rundt Fana kyrkje, som blei kåra til tusenårsplass for Bergen kommune. Han var også ein habil hardingfelespelar og bygde sjølv fleire hardingfeler i tillegg til å samla på feler. Ei av felene hans fekk sølvmedalje under Landskappleiken på Trysil i 1989. Instanes var også ein sterk pådrivar for å få skipa Ole Bull-akademiet på Voss.
I 2006 fekk han Kongens fortenestmedalje i gull.
Kjelder
Denne artikkelen bygger på «Bjarne Instanes» frå , den 12. januar 2013.
Bakgrunnsstoff
Øyvind Ask: Broer, tunneler – og hardingfeler. Artikkel i Bergens Tidende 11. mars 2006 Johannes Sekse: Kongegull til Bjarne Instanes. Artikkel i Hardanger Folkeblad 11, mars 2006 Kjempestemning i Eidfjord Artikkel i Hardanger Folkeblad 27. juni 2004
Kategori:Folk frå Ullensvang Kategori:Norske sivilingeniørar Kategori:Kongens fortenestmedalje i gull Kategori:Norske felespelarar Kategori:Norske felemakarar