La sòrre (var. sòr, seror) es lo parent femèla –biologic o social– nascut dels meteisses parents, o del meteis paire o maire, coma un autre o una autra. La condicion d'èsser sòrre es dita sororitat.
La sòrre mai granda en atge es la (sòr(re) o seror) màger, granda o l'ainada.
La sòrre mai pichona en atge es la benjamina, la (sòr(re) o seror) mendra o menuda o la minhòta, la cabdèta, la darrièra (en gascon: capdèta/capdèra, darrèra, darrèira), e colloquialament la cachaniu, caganís/caganid/caganiu, cacau, cagairòla, cagandra, cacandra, cacambra, caganena, cagatrauc, capcoada (?), coassona, cogossòla, cova-niset, escoassa, gastanís/gastaniu, petona, rasclona, recoqueta, sens-tu-fariam, tardona (en gascon: escarranid, escarra-sac, escarralh, coarra o engranhona).
La sòrre a travèrs del paire o de la maire es dita mièja sòrre, sòrre d'un latz o sorrastra (en gascon: mieia seror, seror de mieitat).
Quand es a travèrs del paire solament es dita sòrre de paire. Quand es a travèrs de la maire solament es dita sòrre de maire o sòrre uterina.
Sòrre de lach/lait, 'de popa, 'de noiriça, (var. sòr, gasc. seror de...).