José Luis Gómez Pérez, coñecido como Joselu, nado en Palmeira (Ribeira) o 10 de xuño de 1987, é un exfutbolista galego, que xogaba de dianteiro. É, con 119 goles, o máximo goleador da historia do Racing de Ferrol, club no que militou durante nove tempadas (2014-2023) e ao que chegou despois de marcar 62 goles en dous anos co Compostela.
Traxectoria Formado na canteira do do Celta de Vigo, en 2004 entrou a formar parte do cadro do Celta B, onde non conseguiu a titularidade, fronte a outros dianteiros como Goran Marić ou Iago Aspas.
No verán de 2008 fichou polo Lorca Deportiva. Despois de non ter moitas oportunidades, disputando só cinco partidos, no mercado invernal marchou ao CF Reus Deportiu, de Terceira División. Co Reus non chegou a un acordo para a súa renovación ao remate de tempada, fichando finalmente polo CD Teruel para a tempada 2009/10, da man do seu adestrador no Reus, Ramón Calderé. Co club turolense acadou o ascenso á Segunda División B. Renovou unha tempada máis no CD Teruel e no mercado invernal da tempada 2010-2011 fichou polo Cerceda, co que xogou o que restaba de tempada e outra máis, anotando na segunda delas 20 goles. En xullo de 2011 marcou o seu primeiro gol na Copa do Rei, na vitoria por 2-0 fronte ao CD Tenerife.
En 2012 chegou á SD Compostela, debutando na primeira xornada de liga, e anotando 4 goles no seu primeiro partido en San Lázaro, fronte ao Deportivo Dorneda CF. Acabou con 32 goles a súa primeira tempada en Santiago, 5 deles nos play-offs, contribuíndo de xeito destacado ao ascenso do equipo á Segunda División B. Foi o máximo goleador do Grupo I da Terceira, con 26 goles, 5 máis que Manu Barreiro e Luis Fernández. Na súa segunda campaña marcou 30 goles en 32 partidos, proclamándose como o máximo goleador dos catro grupos da Segunda B.
En 2014 fichou polo Racing de Ferrol. Na súa segunda tempada no club ferrolán foi o máximo goleador do seu grupo da Segunda B, con 20 tantos. Durante os seguintes anos foi engrosando a súa conta anotadora, superando os 109 goles de Pablo Rey e desbancándoo como o máximo goleador da historia do club. O 17 de decembro de 2022 marcou o seu 119º e derradeiro gol co Racing de Ferrol, retirándose ao remate da tempada 2022/23, o día do seu 36º aniversario, despois de acadar o ascenso á Segunda División.
Palmarés Racing de Ferrol Primeira División RFEF (1): 2022/23.
Notas
Véxase tamén Ligazóns externas Datos do xogador en lapreferente.com .
Categoría:Nados en Ribeira Categoría:Nados en 1987 Categoría:Futbolistas de Ribeira Categoría:Xogadores do Celta de Vigo B Categoría:Xogadores do Lorca Deportiva CF Categoría:Xogadores do CF Reus Deportiu Categoría:Xogadores do CD Teruel Categoría:Xogadores do CCD Cerceda Categoría:Xogadores da SD Compostela Categoría:Xogadores do Racing de Ferrol