Sitiveni Rabuka, nado na provincia de Cakaudrove, Fiji, o 13 de setembro de 1948, é un político fixiano que exerce como primeiro ministro de Fiji desde 2022, cargo que ocupou anteriormente desde 1992 até 1999. Foi dirixente do Partido Político Fixiano até a súa disolución, e uniuse ao Partido Liberal Socialdemócrata (SODELPA) logo da chegada ao poder de Frank Bainimarama. Foi líder do partido nas eleccións xerais de 2018, manténdoo como a segunda formación máis grande do Parlamento, e sendo o líder da Oposición, cargo no que se mantivo dous anos máis tarde.
Traxectoria Rabuka é coñecido en Fiji por axudar a instigar os dous golpes de estado de 1987, que sacudiron a política interna do país oceánico. Logo do seu paso pola xefatura de goberno, ocupou o cargo de Presidente do Gran Consello de Xefes, e máis tarde foi designado Presidente do Consello Provincial de Cakaudrove desde 2001 a 2008. Foi elixido para este cargo o 24 de maio de 2001 e reelixido para un novo mandato de tres anos o 13 de abril de 2005. Opositor ao goberno de Frank Bainimarama, Rabuka foi elixido presidente do Partido Liberal Socialdemócrata (SODELPA) en 2016, tras a renuncia de Teimumu Kepa, quen desaprobaba publicamente a elección de Rabuka para a súa substitución. A pesar das divisións internas, o liderado de Rabuka levou o partido a lograr un 39,85% dos votos nas eleccións xerais de 2018 e a crecer 6 escanos con respecto aos comicios anteriores.
Rabuka, que denunciou fraude electoral, foi o líder da Oposición no parlamento despois das eleccións. O 28 de novembro de 2020 perdeu unha elección interna polo liderado do partido contra Viliame Gavoka, que pasou a ocupar o seu cargo parlamentario. Días máis tarde, o 7 de decembro, presentou a súa renuncia como membro do Parlamento, alegando que «xa non quería ser un obstáculo» para o enfoque bipartidista que, segundo el, deberían adoptar os líderes políticos para crear harmonía, progreso e unidade en Fiji.
Rabuka formou un novo partido, a Alianza Popular, para competir nas eleccións xerais de Fiji de 2022. Tras os comicios, Rabuka resultou elixido Primeiro Ministro tras chegar a un acordo de coalición co NFP e o SODELPA.
Notas
Categoría:Nados en 1948 Categoría:Políticos de Fiji Categoría:Primeiros ministros de Fiji