O Colexio San Xosé de Cluny é un centro privado de ensino situado na cidade de Vigo, pertencente á congregación das Irmás de San Xosé de Cluny. Fundado en 1904, constitúe unha das institucións educativas privadas máis antigas da cidade e unha das principais obras da congregación en Galicia.

O centro imparte ensino infantil, primaria, secundaria obrigatoria, bacharelato e formación profesional.

Historia A presenza das Irmás de San Xosé de Cluny en Vigo comezou en 1904, por iniciativa de Clara del Río, unha viguesa que coñecera en Francia a labor educativa da congregación fundada por Anne-Marie Javouhey. As primeiras relixiosas estabelecéronse inicialmente nun inmoble da rúa Real e comezaron a impartir clases de linguas e ensino primaria.

En 1906 o colexio trasladouse á rúa García Barbón, onde ampliou a súa actividade educativa. O aumento do alumnado levou á construción dunha nova sede na Gran Vía, inaugurada en 1931. O edificio, proxectado polo arquitecto vigués Antonio Cominges, foi o primeiro inmoble levantado nesta avenida e converteuse nun dos símbolos da institución durante gran parte do século XX.

En 1987 o centro adoptou a educación mixta e posteriormente integrouse no sistema de ensino concertado.

No ano 2000 inauguráronse as actuais instalacións da rúa Carballo, no barrio de Freixeiro. O antigo edificio da Gran Vía permaneceu en pé ata a súa demolición en 2015-2016.

En 2004, coincidindo co centenario da presenza da institución en Vigo, o colexio foi distinguido co título de Vigués distinguido e coa Medalla de Prata de Galicia.

En 2024 e 2025 a comunidade educativa celebrou os 120 anos da chegada das Irmás de San Xosé de Cluny á cidade.

Características

O proxecto educativo do centro baséase nos principios pedagóxicos da congregación de San Xosé de Cluny, centrados na formación integral da persoa e na educación en valores cristiáns.

As instalacións actuais inclúen biblioteca, salón de actos, laboratorios, aulas de informática, pavillón polideportivo, capela e comedor escolar.

Recoñecementos Vigués distinguido (2004). Medalla de Prata de Galicia (2004).

Notas

Véxase tamén Outros artigos Irmás de San Xosé de Cluny Anne-Marie Javouhey

Categoría:Institucións de ensino de Vigo Categoría:Vigo sen imaxes